Friday, February 2, 2007

بــــــــــوســــــــــــت بالعــــــــربــــــــــي


أولا البوست المرة دي يختلف عن أي بوست..


لعدة أسباب

أهمها اني كاتبة بالعربي :)

و ده طبعا اعجاز و انجاز و كل حاجة


أولا قبل مابتدي أحب بس أهدي البوست ده لكل حد طلب مني أعمل بوست بالعربي

و خصوصا لهيثم ابو عقرب (عشان متقولش اني حارماك من حاجة بس)

__________



ندخل في صلب البوست بقى :)

انا بما ان ليا جماهيرية عظيمة و محبين كتير و كده

فانا اتمررلي تاجين مرة واحدة


الفقي لما يسعد بقى لول



التاج الأول اتمررلي من تسنيم



خمس حاجات محدش يعرفها

al hidden al side btchaa3y ya3ny lol

اوك يا ستي

خدي عندك

1) انا اسمي منة و دايما لما حد يسألني اسمك ايه اقولله Menna يحسب اسمي مينا اه والله ده انا بعاني :)


2) أخواتي اللي اعتذرتلهم في بوست Due sorry من المدونين :)

الكبيرة هي تسنيم اللي ممررالي التاج ده وانا ابقى خبث اللي مبهدلاني في بوستاتها دايما :(

والتانية بقى بما انها مش مديانا الاذن اننا نقول هيا مين فمش هينفع اقول عليها :)


3) انا بقى عندي قابلية للاستسلام فظيعة!

انا مكنتش كده خالص!

مش عارفة ايه جرالي بس معدش عندي روح المثابرة (حلوة المثابرة دي) بتاعت زمان :(


4) فقدت القدرة على البكاء :)

مع العلم اني نحاحة كبيرة أصلا بس معنتش عارفة أعيط :)


5) عندي احساس اني هموت صغيرة أو عالاقل اول حد في اخواتي و اصحابي

حاسة اني مش هطول هنا :)

كانت امنية في الاول بس دلوقتي بقى احساس :)

__________


الحمد لله خلصنا من واحد ندخل عالتاني بقى..

اللي اتدبست فيه بواسطة


الاستاذ/ عمرو أحمد :)



-اية اللي حيحصل لايميلك لما تموت؟

دايما بفكر في الموضوع ده..

و عندي النية اقول السؤال السري لاخواتي (مش هديهم الباس وورد لأ :)) عشان لما اموت يبقو يفتحوا ايميلي و يقولوا للناس اني مت بدل ميسيبوهم كده :)



-اديت الباس وورد لحد قبل كده؟


آه


-لو اه كانت طبيعة علاقتك بيه اية؟

كان صديق مقرب (جهاد) بس طبعا غيرته من زمان :)



-اسمك؟

منة فهيد

Menna fehead



-اسم الدلع المشهور وسط اصحابك؟


ممكن تقولوا موني


-عمرك؟

النهاردة بقى عندي 17 سنة و 3شهور بالظبط :))



-برجك؟

برج العظماء (معايا يا عمرو :))

العقرب



-مجال دراستك؟

3 ثانوي أزهر

و في قصة قصيرة لازم أقولها بعد الكلمتين دوول

نظام هي اه نظرية واحدة بس ليها 3 نتايج لول

1) اني اخدة سنة 6 فالمفروض انا اكبر بسنة هتقولوا ما 6 رجعت برة دلوقتي

هقولكم بس جيلي الناس اللي أدي مخدتهاش :)

2) اني لما أقول علمي محدش يقوللي علمي علوم ولا رياضة عشان التوكنولوشيا دي لسه موصلتلناش الصراحة

معندناش رفاهية الاختيار دي

احنا العلمي عندنا

شـــــــــــــــــــــامــــــــــــــــــــل


يعني فيزيا و كيميا و احياء و رياضة 2 :)

3) محدش يسأل عملتي ايه في 2؟

عشان الازهر 2 نقل عادي

3 بس اللي شهادة :)


-شخصيتك نوعها ايه؟

شخصية ما يعلم بيها اللا ربنا :)))

بجد مش عارفة اقول ايه..

بس هي شخصية مش سهلة على عكس الظاهر :)

قليلين أوي اللي فهموها وانا مش من ضمنهم :)))

أنا عارفة ان دي مش اجابة محددة..

بس أنا بحب الغموض :))



-السفر بالنسبة لك؟

أكيد حاجة تعقد..

بس يتنفذ بالشكل الصح :)



-المود بتاعك؟

أصلا انا اليومين دوول بقيت مجنونة رسمي و بضحك بشكل غبي على أي و كل حاجة :)

بس عامة انا بهزر كتير أوي

و بهيس كتير أوي

بس عندي جانب الجد برده مانيش أي كلام يعني :)

"زوروني تجدوا ما يسركم ":))




-وقت فراغك بتعمل فيه ايه؟

بعمل الحاجات اللي ببقى عايزة اعملها

قراءة, نت, تليفونات, أفلام..

حسب مزاجي لما بفضى ببقى عايزة اعمل ايه :)


-الاكلة المفضلة؟

مبحبش الاكل عموما :)

نظام الطبيخ و كده مليش فيه.. أي حاجة عيش و تفاليت بقى أحبها

بس بعشق السيبيا و الجمبري :)


-الصفات اللي خدتها من بابا؟

مفكرتش في الموضوع ده قبل كده الصراحة

أنا شبه بابا شكلا أصلا

و ان كانت عنيا مش خضرا زي عنيه :(

مممممممممممم

ممكن يكون الكلام الكتير :)))

و حب الفلوس الفكة:)))))

دي كفاية اصلا لول

و مش عارفة ايه تاني بقى....


-الصفات اللي خدتها من ماما؟

ماما...

أكيد العند بس انا اخداه متحور شوية

بعند على نفسي مش عالناس :)

حكاية ان محدش يلعب في شنطتي :))

اني متحطش في موقف اني اتحوج لحد في فلوس ابدا :)



-اكتر 6 حاجات بتكرهها؟

البروووووووووووووووووووووووووووووووووووووووووووووووووووووووووووووووووود

استحمل أي حاجة اللا اني اتعامل مع انسان بارد و قلبه ميت و لكعي كده


الظلم


اني احس بالعجز واني مش قادرة اعمل حاجة!


المحشي والسمك :))))))))))))))))))))))))


الابتزاز العاطفي


عدم التقدير



-اكتر 6 حاجات بتحبها؟


اكيد ربنا:)


الصداقة


الجو الاسري و العائلي


الضحك


أي فيلم اجنبي فيه فساتين منفوشة و خيول والنظام ده :))))))))))

(حيث انتمي)


الفلوس الفكة :))))

تقريبا ده مرض اصلا :)

ممكن أموت لو معييش في محفظتي عالاقل 15 جنيه فكة :))

أكتر حاجة وصلتلها كانت 42 جنيه لول




-الشغل بالنسة لك؟

متعة بدال عن حب و في جو تعاون في المكان اللي بتشتغل فيه



-ايه الكمبيوتر والانترنت بالنسبة لك؟

عالم آخر :)
__________

ادبس الناس بقى زي ما ادبست انا :)

التاج الاولاني بتاع تسنيم

بمرره لكل من:

عمرو أحمد

اسراء

الطربوش (الدسوقي)

طلال فيصل

sofinqoraso


التاني بتاع الاسئلة الكتير ده

بمرره لكل من:

تسنيم

هيثم ابو عقرب

القمحاوي

الحصان الاسود

31 comments:

تسـنيم said...

بصي يا قمر أنا فضلت حافظة السر وإنتي اللي فتشتيه بنفسك ولعلمك أنا هغير لينك مدونتك اللي عندي وهخليه خبث ههههههههههههه لأ مش للدرجة دي بس هصيح في كل مكان مين هيا خبث.
إنتي حاسة إنك هتموتي اول واحدة دي كانت أمنية عندي علشان أنا أنانية ومش هستحمل كسر القلب لما حبيب ليا يمشي قبلي لكن أنا متأكدة إني هكون أخر واحدة هتمشي وإن كل أصحابي وأهلي ويمكن كمان أولادي لما يبقى عندي اولاد هيمشوا قبلي.
بحبك أوي يا منة فوق ما تتخيلي.

تسـنيم said...

نسيت أقولك إن خطك في الإنجليزي أحلى.
ههههههههههههههههههههههههه

Amr Ahmed said...

موني اجاباتك حلوة اوي

ومبروك علي الكتابة بالعربي

انا بصراحة كنت عاوز اطلب منك انك تكتبي عربي

بس قلت كل واحد حر في مدونته بقي

بس من غير زعل بجد

التاج ده بالذات مش هاقدر ارد عليه

ان بجد اسف وهابقي اقولك علي الاسباب

بس فعلا مش هاينفع
لاني لو جاوبت

يبقي هاقول حاجات اي كلام

وانا بحب اجاوب بصراحة

اوعي تزعلي مني

انا عارف انك جاوبتي علي التاج اللي انا بعته

بس انا عندي اسبابي

اوك يا جميل

مش زعلانة صح؟
تحياتي

zordeak said...

موونى


الحمد لله انك كتبتى بالعربى يا شيخة

احنا معوقين اصلا

بحس ان الكلام الانجليزى كتيير كده فبزهق انى اقراه

مع انى حلو فى الانجليزى


تخيلى جبت 25 فى تانية ثانوى
و25 كمان فى تالتة

يعنى قفلت الانجليزى

بس برضو بحب اكتب بالعربى

لغتنا الام

حلوة الام دى

ههههههههه

نيجى بقى للتاج


انتى مفضحتييش نفسك

انا سيحت لنفسى خااالص

مش عارف مطلعتش ذكى ليه زيك

:D

بتحبى الفلوس الفكة


والله حاجة جمييلة

وفكة بقى يعنى فضة ولا ورق فكة

شكرا على زيارتك الجمييلة عندى

ده انتى مسبتيش حاجة مقريتيهاش يا بنتى


بس اقولك على حاجة

نورتينى والله بجد


وحاجة كمان


هيييييييييييه

انا مبسوط اخيرا انى عرفت مين خبث


تسنيم مكانتش عايزة تقول

هيييييييييييه

Mony The Angel said...

tasneem:
eh da ya bet da
ya3ny albo2een al7elween dool alwa7ed makansh yenfa3 yesma3hom 3'eer lama y2ool enno 7'obbos lol
bzemetek da esm da :(
ana kaan 3agebny lo22om aktar :s
bas yalla esmetchy w naseeby ha3mel eh :)
thanks ya tota 3al first comment w 3ala ennek gawebty altag aly b3atholek :)
i love u too (l)
_________
Amr:
asdak ya3ny eny ma3reftesh adabesak :(
lel asaf msh ha2dar az3al, az3al mennak azay bas ba3d qasedet al e3tezaar elly enta aielha de :)
mashy ya seedy bas ana 3aiza a3raf al asbaab ha3rafha azay w hat2olly 3aleeha ba3deen feen lol?
__________
ahmad:
lol @ mo3waqeen de :D
btw, da kan post tafra kda msh hakamel 3araby lol
dana a3adt yomeen w nos bakteb feeh lol.. w kol magy akteb 7arf al waw yetla3 teh marboota lol
da ana et3azebt wallahy :(
anyways, welcome beek 3andy w thanks 3al comment w mabsoota enak mabsoot enak 3reft meen 7'obbos a7'eran :D
hope 2 c u here again

LAMIA MAHMOUD said...

اية ده تسنيم اختك وانتي بقى خبث اختها الصغيرة .. طيب تظبيط .. لاء بس انا كده قافشة معايا اعرف التالتة مين والنبي والنبي .. اقولك ابقي قوليهالي بيني وبينك .. وبعدين ما تعيطيش عمرك يارب..ولا تزعلي .. وبعدين كده حنتخانق الميزان هو اللي برج العظماء .. حنمسك في بعض بقى وتطلعيلي برة البلوجرز:)
وبعدين عجبتك مثابرة ومعجبتكيش الابتزاز العاطفي .. ما انتي بتقولي كلام كبير من الصبح

والله انتي عسل

محمد الدسوقى رشدى said...

بقى كده يامنة بتدبسينى التدبيسة دى
ماشى
أنا هرد وهجاوب
بس حسابك بعدين

camera_girl said...

اجابتك جميله على فكره انا مقدره احساسك بأنك مش هتكملى فالحياه لكن انا وانا قدك كنت كده وبشكل قوى لكن بمجرد ما هتعدى المرحله دى مش هقوللك هتفقديه تماما لكن هيقل كتير طببعا قصدى ععالأحساس لما بتكتبى عربى الأحساس بيكون اعلى رغم ان كتاباتك بالأنجليش تحفه يا بنتى ومن زمان نفسى اعلقلك

ربنا معاكى يا منة يا جميله ونفسى اشوفللك بوست تانى بالعربى وبجد اجاباتك كانت حلوه

camera_girl said...

بالمناسبه شكللك من الناس الى هتعمر كتير اوى فالدنيا (ربنا خد منك كل حاجه واداكى الصحه

shabfa2re said...

هييييييييييه هييييييه
بوست بالعربى

Mony The Angel said...

lamia:
enty ally 3asal :)
w ah ya setty ana 7'obos :)
w about al abraag
al3a2rab hwa borg al3ozamaa2
alketaab bi2ool kda ;)
________
Ma7ammad:
welcome ya man
hia ah tadbeesa bas tadbeesa helwa ;)
mestania ashoof egabatak :D
________
camira girl:
welcome beeky ya gameela 3andy :)
w bgad thanks awee 3ala kalamek algameel da :)
hope 2 c u here again
________
shaabfa2re:
yea post bel3araby :)

هيثم ابوعقرب said...

انا اتدبست يا منه بجد
لاني حالف ع البلوج بتاعي مكتبش فيهالحاجات دي

وبرضو ف نفس الوقت مش عايز اكسفك
ف الموضوع ف ايديك دلوقت وشوفي
لي حل

shaimaa said...

el7mdol allah 2n 2smk tl3 manna :)

2sm gmeel..2sl ana kont 7'yfa yekon mona w el2sm da elsra7a ana mt32da mno..
congratulations 3la 2wl post arabic ..ana 2wl ma ktbt brdo kant english posts bs 2s7abi mst7mlosh :)..u seems 2 be a nice person w ana brdo b3sh2 zeek el movies eli feha 7'eol w dresses mnfosha..t2rebn a7na gna fe elzmn da 3'lt..bs el2zma b2a beni w benk 2ni b7b m7shi wr2 el3nb w elsmk

malak said...

بجد اجابتك حلوة جدا
ياريت تستمرى بالكتابة بالعربى يا مونى
حقيقى بندم انى مدخاتش على مدونتك من زمان
تحياتى

Mony The Angel said...

Haitham:
:(
b2a kda bardo :(
lazem tetsarra3 ya3ny w te7lef..
any way..
ana kan nefsy tgaweb, bas badal enta 7alef wala yhemmak 7'las :)
sama7 almarady yaseedy, ana bardo mai7'lasneesh teddabes :)
__________
sho sho:
mnawara al blog (f)
w la ya setty masmesh mona :)
w about al zaman altaany, enty 3arfa eny badawar gedeian 3ala alet zaman teraga3ny lelqarn al 18 7aiso antamy :D
bas badal enty kaman tle3ty zaiee, hab2a a3mel 7esabek m3aia b2a ok ;)
entazery menny telephone lama ala2eeha :)
w alma7shy welsmak la yofsedoon lelwed qadia ya amar (L)
_________

Malak:
mnawara ya gameela :)
w thanks 4 ur sweet words..
hope 2 c u here again (f)

مبرمج حر said...

حلوه أوى الأتحاد ده يا مونى , على فكره أنتوا المفروض تعملوا مدونه جديده مشتركه بينكوا أنتوا التلاته و يبقى أسمها أتحاد الأخوات الثلاثه
أو مدونة تيم
TEM
الحرف الأول من كل أسم من أسمأكو
وتشتركوا فيها أنتوا التلاته

على فكره أنا عديت الحاجه الساقعه بمزاجى المره دى لكن المره الجايه مش هدخل مدونتك إلا أما أشرب الساقع

أحمد عيسي said...

واضح انك بتحبي افلام الكاوبوي ولا انا فهمت غلط؟وبتحبي الاغاني الغربي واحتمال كمان الموسيقي الكلاسيك؟
الحمد لله افتكرت نفسي لوحدي طلعنا كتير

esraa said...

ايه ده يابنتي , ده انت طلعتي معقده الناس كلها, وكلهم كان نفسهم في بوست عربي (:

عين ضيقة said...

أولا شكرا ع العربى ول انه مكسر شويه
ثانيا:ابكى أرجوك.اتعلمى من تانى
ثالثا:حلو البوست ودمك فيه خفيف وكمان باين انك مش مش سهلة قوى
ربنا يوفقك فى مذاكرتك لان تنسيق الازهر بقى رخم زى حاجات كتيرة فيه
بالتوفيق

Mony The Angel said...

mobarmeg:
thanks 3alcomment w 3alfekra bta3et al blog :)
hab2a ab7asha m3a lo22om w soosa lol
w about al7aga alsa23a, enta abs to2mor ya maan ;)
____________
a7mad 3eesa:
welcome beek again..
w msh aflaam al cow boy ally kont a2sodha :)
bas ba2eet alhagat sa7 :)
ettamen mantaash lewa7dak e7na kteeeeeeeeeeeeeeeeeeeeeeeeeeeer :)
_____________
esraa:
ah shofty alhana ally ana feeh :)
maie3rafoosh eno post temporary msh permanent lol
______________
3een daia2a:
awalan:
welcome ya gameela, w about al3araby da ana shoft alweel 3shan akteb albo2een dool lol
mekassar mekassar b2a :D
saneian:i'm trying but i can't :(
salesan: rabena ye7'aleeky :)
w about tansee2 al azhar, u r compeletly right..
so da3awatek m3ana b2a ;)
hope 2 c u here again :)

frozen love said...

2gabtk f3lan ra23aaa....7war eltag da asbt nga7o f3lan...bey2rb elmdwnen mn b3d

t7yaty

elkamhawi said...

اوك يا ستى
اخد الاسئلة بس على فكرة دى من بردة المنهج
تسمحيلى ابرشم

Mony The Angel said...

frozen:
welcome beek 3andy :)
w ana m3aak fe7waar altag w ta2seero da :)
hope 2 c u here again..
_______
al kamhawy:
barshem bra7tak almohem ashoof altaag 3andak metgaweb 3aleeh ;)

shams said...

مبروك أول بوست عربي يا موني مع إني بحب كتاباتك اللي بالإنجليزي بس اللي كان متعب فعلاً إني أقرأ الكلام العربي بحروف إنجليزي وإجاباتك جميلة وعجبني فيها الأفلام اللي بتحبيها لأني بحب برده نفسي النوعية بتاعة الأحصنة والفساتين وربنا يباركلك في عمرك يا ستي وعقبال تاني بوست بالعربي وانا متأكده إنه هيبقى بنفس جمال الإنجليزي لأن الشخصية واحدة

الحصان الأسود said...

انتي بتدبسيني في تاج

هوة اية الحكاية اليومين دول التاجات نازلة عليا زي المطر

مش كنتم تبعتوا فلوس طيب احسن

اة لو الاج بفلوس كنا اغتنينا

بقى انتي طلعتي ثانوي ازهري وعاملة فيها خواجاية خريجة جامعه اجنبية وهارينا كتابة بالانجلش و خليتينا قلنا " دي اتكلمتو أرابي سوية سوية" وفي الاخر ثانوي ازهري مجاني يا مفترية
:)
انا لغاية دلوقتي مش عارف اجاوب عالتاجات اللي متدبس فيها بس بجد فية حاجات مش عاوز اقولها
يمكن اعملها غامضة شوية

تحياتي

طلال فيصل said...

واحنا نطول يا ست منة نتدبس كدة ..ربنا يعينك على كمية المواد الغير عادى اللى عليك وادعيلى جامد عشان عندى امتحان اطفال ودا السر الخطير اللى مخلينى مش بفتح النت (الأطفال مش دايما حلوين بيبقوا فى غاية السخافة لما تذاكرهم)..اذن ..سلام مؤقت حتى نلتقى

Mony The Angel said...

shams:
allah yebarek feeky
da ana 3aneet bshakl wana baktebo :)
w sorry 3shan bat3ebek m3aia wenty bte2ry commentaty ally be franco-arab :$
hope 2 always c u here
_____________

the black horse:
maweteny 3la nafsy melde7k ya seedy :D
ah ana sanaweia azhary..
bas madrasty tagreeby :D
maybe da ally m2assar 3lia shwaia
w thanks enak gawebt 3altag :)
_____________
talal:
thanks awe enak commenteet ra3'm enak msh faady :)
i remember ur exam, u told me about it before :)
ana bad3eelak wallahy, shed 7elak enta bas 3shan terga3lena w tgaweb 3al tag ;)

chaos said...

بعد ما قريت التاج بتاعك احب نبقي اصحاب ممكن؟؟؟؟؟؟
c u @ my blog

هيثم ابوعقرب said...

شكله كان بوست وحش عليا
10 ايام ف السرير
حرام عليكي
انا جه تاني
ههههههههههههه
وجاوبتلك ع التاج روحي اقريه ف

http://ed7ak3ldonia.blogspot.com/

amazing_angel said...

nice blog,fine u have time to write especially u are in the secondary stage!

إنـســانة said...

يانهار ابيض يا منة
هو انتى اخت إسراء وتسنيم
مش تقولى يابنتى؟؟؟
ههههههههههههه

فالحة نرغى مع بعض ونتصاحب وانا اقول ياربى فين مدونة منة اختهم التالتة دى أتاريكى إنتى

يلا ياستى حصل خير

وربنا يخليك الفكة فى جيبك دايما