شكراً عشان كل مرة، كنت باجي اقترح عليكي فيها إقتراح مجنون
و انا متأكدة انك أكيد مش هترضي
بالعكس يا هتشتميني يا هتحدفيني بحاجة ف وشي
كنتي بتفاجئيني وبتوافقي!
شكراً عشان لما جتلك مرة الساعة 6 الصبح أصحيكي من النوم
واقوللك قومي البسي عشان نخرج قبل منروح الكلية
مشتمتنيش ولا زعقتيلي وكل اللي عملتيه قولتيلي
"هنروح فين بس دلوقتي؟"
"فلما قلتلك "أي حتة
قمتي فعلاً لبستي وخرجنا سوا الساعة 7 قبل منروح الكلية!
شكراً عشان لما كانت الدنيا بترخ
وكانت أمنية حياتي ساعتها اني أنزل أقف تحت المطرة
وافقتي تنزلي معايا
رغم انك كنتي لسة جاية من تحت
ورغم إن الساعة كانت ساعتها عدت 8
(التمام بتاعنا فالمدينة)
وفعلاً نزلتي ودورتي معايا تحت المطرة كمان
شكراً عشان لما جتلك من يومين أقولك أنا مخنوقة وعايزة أخرج
وكان عندنا تاني يوم 3 إمتحانات ومكناش لسة فتحنا ولا واحد فيهم
مطلعتيش فيا أكلتينتي ووافقتي
لحد دلوقتي معرفش ازاي!
شكراً على كل مرة ضحكنا فيها من قلبنا بجد لحد ما عيطنا
على كل ليلة أو نهار إمتحان قضيناه سوا
بنتكلم فيه عن كل حاجة وأي حاجة
تانية غير المادة اللي المفروض نروح نمتحن فيها
شكراً على كل فيلم شفناه سوا
وكل أغنية سمعناها سوا
وكل خروجة خرجناها مع بعض
على كل إمتحان دخلناه واحنا مش مذاكرين
وكل إمتحان دخلناه معرفناش نحل فيه و قعدنا نبص لبعض ونضحك
شكراً عشان انتي كنتي أول صاحبة أطلع بيها من أم الكلية دي
وبرغم اني مقدرش اتنبأ من دلوقتي احنا هنفضل صحاب لحد امتى
الا اني عارفة ان لو كل حاجة بيننا اتقطعت
واتقابلنا او اتكلمنا بعد كام سنة مش هتبقي نستيني
ولو حصل ومافتكرتنيش..
فانا متأكدة اني مش هزعل ساعتها
*العنوان اسقاط على ذاكرة ولاء الفلاشية
**الصورة بحسها محاولة من رابي خان لرسمنا
